Updated on:
கொல்கத்தா: குஜராத், உத்தராகண்ட், அசாம் மாநிலங்களில் பின்பற்றப்பட்ட அதே நடைமுறையைப் பின்பற்றி மேற்கு வங்கத்திலும் பொது சிவில் சட்டம் அமல்படுத்தப்படும் என்று அம்மாநில முதல்வர் சுவேந்து அதிகாரி தெரிவித்துள்ளார்.
கொல்கத்தாவில் செய்தியாளர்களிடம் பேசிய சுவேந்து அதிகாரி, “மேற்கு வங்கத்தில் பொது சிவில் சட்டம் அமல்படுத்தப்படும். இதற்கென ஒரு குறிப்பிட்ட நடைமுறை உள்ளது. அதை சட்டப்பேரவையில் நான் விளக்குவேன். ஓய்வுபெற்ற நீதிபதி ஒருவரின் தலைமையின் கீழ் ஒரு குழு அமைக்கப்படும். குஜராத், உத்தராகண்ட், அசாம் மாநிலங்களில் பின்பற்றப்பட்ட அதே நடைமுறையைப் பின்பற்றி பொது சிவில் சட்டம் அமல்படுத்தப்படும். இது குறித்த கூடுதல் விவரங்களை வரும் திங்கள் கிழமை சட்டப்பேரவையில் நான் தெரிவிப்பேன்.
மம்தா பானர்ஜி தலைமையிலான முந்தைய அரசில் ஊழலும், வாரிசு அரசியலும்தான் மேற்கு வங்கத்தின் அடையாளமாக முன்னிறுத்தப்பட்டன. இதன் காரணமாக மாநிலம் பின்தங்கிய நிலைக்கு கொண்டு செல்லப்பட்டது. ரவீந்திரநாத் தாகூர், பங்கிம் சந்திரர் போன்ற ஆளுமைகளின் பாரம்பரியத்தை முன்னிறுத்துவது அவர்களின் செயல்திட்டமாக இருக்கவில்லை.
இப்போது ஒரு தேசியவாத அரசு ஆட்சியில் உள்ளது. எனவே, இத்தகைய பணிகள் அனைத்தும் முன்னெடுக்கப்படும். இந்த ஆண்டு வந்தே மாதரம் பாடலின் 150-வது ஆண்டாகும். இதற்காக பட்ஜெட்டில் ஒரு முக்கிய முன்னெடுப்பை நாங்கள் அறிவித்துள்ளோம். வந்தே மாதரம் பாடலின் 150வது ஆண்டைக் குறிக்கும் வகையில், தேசிய அளவிலான அருங்காட்சியகம் ஒன்றை அமைப்பது குறித்து அறிவிக்க உள்ளோம்” என தெரிவித்தார்.
நம் நாட்டில் பொது சிவில் சட்டம் தற்போது கோவா, உத்தராகண்ட், குஜராத், அசாம் ஆகிய பாஜக ஆளும் மாநிலங்களில் அதிகாரப்பூர்வமாக நடைமுறையில் உள்ளது அல்லது சட்டமாக இயற்றப்பட்டுள்ளது. இதில் சில மாநிலங்கள் ஏற்கெனவே சட்டத்தை அமல்படுத்தி விட்ட நிலையில், மற்றவை அதற்கான இறுதிக் கட்டப் பணிகளை மேற்கொண்டு வருகின்றன. மகாராஷ்டிராவிலும் பொது சிவில் சட்டத்தைக் கொண்டு வர அந்த மாநில அரசு திட்டமிட்டுள்ளது.
இது குறித்து கடந்த 23-ம் தேதி அம்மாநில சட்டப்பேரவையில் பேசிய மகாராஷ்டிர மாநில உள்துறை இணை அமைச்சர் யோகேஷ் கதம், “மகாராஷ்டிராவில் பொது சிவில் சட்டத்தைக் கொண்டு வருவதில் 100% உறுதியாக உள்ளோம். இதற்கான வரைவு மசோதாவைத் தயாரிக்க ஓய்வு பெற்ற உயர் நீதிமன்ற நீதிபதி தலைமையில் குழு அமைக்கப்பட்டுள்ளது.
வரைவு மசோதாவை தயாரிப்பதற்கான பணிகளில் இந்தக் குழு தீவிரமாக ஈடுபட்டுள்ளது. இந்த சட்டம் மூலம் பலதார மணம் தடை செய்யப்படும். இந்தச் சட்டம் அமலுக்கு வரும்போது பலதார மணம் செய்பவர்களுக்கு 7 ஆண்டு வரை சிறைத் தண்டனை விதிக்க வழி வகை செய்யப்படும்” என தெரிவித்திருந்தார். இந்நிலையில், மேற்கு வங்க மாநில அரசும் பொது சிவில் சட்டத்தை அமல்படுத்த நடவடிக்கை எடுத்து வருவது குறிப்பிடத்தக்கது.
此内容由惯性聚合(RSS阅读器)自动聚合整理，仅供阅读参考。 原文来自 — 版权归原作者所有。