Updated on:
டொரண்டோ: உலகக் கோப்பை கால்பந்துப் போட்டியின் எல் பிரிவு ஆட்டத்தில் பனாமாவை, குரோஷியா அணி வீழ்த்தியது. இந்த ஆட்டத்தில் குரோஷிய வீரர் அன்டே புடிமிர் அற்புதமான கோலை அடித்து அணியின் வெற்றிக்கு உதவினார்.
டொரண்டோவின் பிஎம்ஓ ஃபீல்ட் மைதானத்தில் இந்த லீக் ஆட்டம் நேற்று அதிகாலை 4.30 மணிக்கு நடைபெற்றது. குரோஷியா தனது முதல் லீக் ஆட்டத்தில் இங்கிலாந்திடம் 4-2 என்ற கோல் கணக்கில் தோல்வியடைந்த நிலையில் களமிறங்கியது. இது முக்கியமான ஆட்டம் என்பதால் குரோஷிய வீரர்கள் ஆக்ரோஷமாக விளையாடினர். முதல் பாதியில் இரு அணியினரும் விட்டுக்கொடுக்காமல் அதிரடியாக விளையாடியபோதும் கோல் ஏதும் விழவில்லை.
முதல் பாதியின் 23-வது நிமிடத்தில் கோலடிக்கும் வாய்ப்பு பனாமா அணியினருக்குக் கிடைத்தது. கார்னர் பகுதியிலிருந்து கிடைத்த கிராஸ் மூலம் பந்தை தலையால் முட்டி கோலாக்க லூயிஸ் ரோட்ரிக்ஸ் முயன்றார். ஆனால் அந்த வாய்ப்பை குரோஷியா கோல்கீப்பர் லிவாகோவிச் தடுத்துவிட்டார். இதனால் பந்து கோல் கம்பத்தில் மோதி வெளியே ஓடியது.
2-வது பாதி தொடக்கத்தின்போது குரோஷிய வீரர் பீட்டர் முஸா களத்துக்கு வெளியே அனுப்பப்பட்டு அன்டே புடிமிர் கொண்டு வரப்பட்டார். அவரது வருகையால் குரோஷிய வீரர்கள் உற்சாகம் அடைந்தனர். அதற்கு நல்ல பலனும் கிடைத்தது. 54-வது நிமிடத்தில் குரோஷிய அணி முதல் கோலை அடித்து 1-0 என்ற கணக்கில் முன்னிலை கண்டது.
கோல் கம்பத்தின் வலதுபுறத்தில் இருந்து பந்தைக் கொண்டு வந்த குரோஷிய வீரர் ஜோசப் ஸ்டானிசிக் பாக்ஸ் பகுதிக்குள் அனுப்பினார். அதைச் சரியாக கவனித்து அன்டே புடிமிர் தூரத்திலிருந்தே பந்தை வலுவாக உதைத்தார்.
இந்த பந்தை கோல் வலையைத் துளைத்தது. இதைத் தொடர்ந்து கிடைத்த வாய்ப்புகளை குரோஷிய வீரர்கள் சரியாக பயன்படுத்தவில்லை. இறுதியில் 1-0 என்ற கணக்கில் குரோஷியா வெற்றி கண்டது. குரோஷியா இந்த வெற்றியின் மூலம் குரூப் எல் புள்ளிப் பட்டியலில் 3 புள்ளிகளைப் பெற்று 3-வது இடத்தில் உள்ளது.
இங்கிலாந்து, கானா ஆகிய அணிகள் தலா நான்கு புள்ளிகளுடன் முதல் 2 இடங்களில் உள்ளன. இந்த வெற்றியின் மூலம் 3 புள்ளிகளைப் பெற்றுள்ள குரோஷியா அணி, நாக்-அவுட் சுற்றுக்கு முன்னேறுவதற்கான வாய்ப்பைத் தக்கவைத்துக் கொண்டுள்ளது. முதல் 2 லீக் போட்டிகளிலும் தோல்வி கண்டுள்ள பனாமா அணி நாக்-அவுட் சுற்றுக்கு முன்னேறும் வாய்ப்பை இழந்துவிட்டது.
நாளைய ஆட்டங்கள்
குராசாவோ vs ஐவரி கோஸ்ட் - அதிகாலை 1.30
ஈக்வடார் vs ஜெர்மனி - அதிகாலை 1.30
துனிசியா vs நெதர்லாந்து - அதிகாலை 4.30
ஜப்பான் vs ஸ்வீடன் - காலை 4.30
துருக்கி vs அமெரிக்கா - காலை 7.30
பராகுவே vs ஆஸ்திரேலியா - காலை 7.30
此内容由惯性聚合(RSS阅读器)自动聚合整理，仅供阅读参考。 原文来自 — 版权归原作者所有。