Updated on:
கூகுள் மேப்பில் வழி தேடுவது, ட்ரோன் மூலம் நிலங்களை அளவிடுவது, வெள்ள அபாயப் பகுதிகளைக் கணிப்பது, செயற்கைக்கோள் படங்களை ஆய்வுசெய்வது எனப் புவியியல் சார்ந்த தொழில்நுட்பங்கள் இன்று நம் அன்றாட வாழ்க்கையின் ஓர் அங்கமாகிவிட்டன.
இவற்றைப் பற்றிப் பேசும்போது ஜியோடசி, ஜியோ மேட்டிக்ஸ், ஜியோ இன்ஃபர்மேட்டிக்ஸ், ஜிஐஎஸ் போன்ற பெயர்களைக் கேள்விப்பட்டிருப்போம். இவை அனைத்தும் ஒரே பொருளைக் குறிக்கின்றனவா? இல்லை. ஒன்றுக்கு மற்றொன்று தொடர்புடையவை என்றாலும், ஒவ்வொன்றுக்கும் தனித்தனி பங்கு உண்டு.
அடித்தளம் – ஜியோடசி ஒரு கட்டிடத்துக்கு எப்படித் தளம் முக்கியமோ, அதுபோல இந்தத் துறைகள் அனைத்துக்கும் அடித் தளமாக இருப்பது ஜியோடசி. பூமியின் வடிவம், அளவு, சுழற்சி, ஈர்ப்பு விசை ஆகியவற்றை மிகத் துல்லியமாக ஆய்வு செய்யும் அடிப்படை அறிவியல் தான் ஜியோடசி. ஜிபிஎஸ் (GPS), ஜிஎன்எஸ்எஸ் (GNSS) போன்ற இடம் காணும் அமைப்புகள் துல்லியமாகச் செயல்படுவதற்கும் உலகம் முழுவ தும் ஒரே அளவீட்டு முறையைப் பின்பற்றுவதற்கும் இந்த அறிவியலே அடித்தளமாக உள்ளது.
கோட்பாட்டை ஜியோடசி வழங்கு கிறது எனில், அந்தக் கோட்பாட்டைக் களத்தில் செயல்படுத்துவது ஜியோமேட் டிக்ஸ். நிலப்பரப்பை நேரடியாக அளவிடுதல், ட்ரோன்கள் மூலம் படம் பிடித்தல், ‘LiDAR’ தொழில்நுட்பத்தின் மூலம் தகவலைப் பதிவுசெய்தல், செயற்கைக்கோள் தரவைப் பெறுதல் போன்ற அனைத்தும் ஜியோமேட்டிக்ஸ் துறையின் பணிகளாகும்.
சென்னை வெள்ள வடிகால் திட்டங்கள், நில அளவீடுகள், காட்டுப் பகுதி கண்காணிப்பு போன்ற பல பணிகளில் இந்தத் தொழில்நுட்பங்கள் பயன்படுத்தப்படுகின்றன. இந்தக் கட்டத்தில் சேகரிக்கப்படும் தரவுகள் தான், அடுத்ததாக ஜியோ இன்ஃபர் மேட்டிக்ஸ் மூலம் பகுப்பாய்வு செய்யப்படுகின்றன.
தரவுகளைச் சேகரிப்பது மட்டுமே போதாது. அவற்றைப் பகுப்பாய்வு செய்து பயனுள்ள தகவல் களாக மாற்ற வேண்டும். அதைத்தான் ஜியோ இன்ஃபர்மேட்டிக்ஸ் செய்கிறது.
செயற்கைக்கோள்கள், ட்ரோன்கள், நில அளவீடுகள் மூலம் கிடைக்கும் கோடிக்கணக்கான தரவுகளைக் கணினி அறிவியல், தரவு இயல், செயற்கை நுண்ணறிவு உதவியுடன் ஆய்வுசெய்து திட்டமிடலுக்கும் முடிவெடுப்பதற்கும் உதவும் முக்கியத் தகவலாக மாற்றுகிறது.
ஒரு பகுதியில் காட்டுப்பரப்பு குறைந்துள்ளதா, எந்தெந்த இடங்களில் வெள்ள அபாயம் அதிகம், நகர வளர்ச்சி எந்தத் திசையில் நடை பெறுகிறது, எந்தெந்தப் பகுதிகளில் நிலத்தடி நீர் வளம் குறைகிறது என்பது போன்ற கேள்விகளுக்குப் பதிலளிப்பது இந்தத் துறையின் முக்கியப் பணி யாகும்.
ஜிஐஎஸ் (GIS) என்பது ஜியோ இன்ஃபர் மேட்டிக்ஸ் துறையின் மிக முக்கியமான கருவி அல்லது அமைப்பு எனலாம். தரவுகளைச் சேமித்து, பகுப்பாய்வு செய்து, வரைபடமாகக் காட்சிப்படுத்தி முடிவெடுக்க உதவும் ஒரு தொழில்நுட்ப அமைப்பே ஜிஐஎஸ். அது தனி அறிவியல் துறை அல்ல. அதனால்தான் ஒரே வரைபடத்தில் மருத்துவமனைகள், சாலைகள், மக்கள்தொகை, மழைப் பொழிவு, வெள்ள அபாயம், நிலப் பயன் பாடு போன்ற பல்வேறு தகவல்களை ஒருங்கிணைத்து ஆய்வுசெய்ய முடி கிறது.
அன்றாட வாழ்க்கையில்
இந்தத் தொழில்நுட்பங்கள் நமக்குத் தெரியாமலேயே இன்றைக்கு நம் அன்றாட வாழ்க்கையின் ஓர் அங்கமாகி விட்டன. கூகுள் மேப்ஸ், ஊபர் போன்ற செயலிகள் போக்குவரத்து நெரிசலைக் கணித்து விரைவான பாதையைத் தேர்வு செய்கின்றன.
ஸ்விகி, ஸொமேட்டோ போன்ற செயலிகள் அருகிலுள்ள விநியோக மையத்தி லிருந்து உணவை விரைவாக விநியோகிக்கின்றன. அமேசான், ஃபிளிப்கார்ட் போன்ற நிறுவனங்கள் முகவரிகளைப் புவியியல் இடங்களாக மாற்றி விநியோகத் திட்டமிடலை மேம்படுத்துகின்றன. நாம் அன்றாடம் பயன்படுத்தும் பல டிஜிட்டல் சேவைகளின் பின்னணியில் இந்தத் தொழில் நுட்பங்களின் ஒருங்கிணைந்த செயல்பாடு அமைதியாக இயங்கிக் கொண்டி ருக்கிறது.
அண்ணா பல்கலைக்கழகத்தின் ஐஆர்எஸ்
தமிழ்நாட்டில் இந்தத் துறையின் வளர்ச்சிக்கு அண்ணா பல்கலைக் கழகத்தின் ரிமோட் சென்சிங் நிறுவனம் (IRS) குறிப்பிடத்தக்க பங்களிப்பை வழங்கியுள்ளது. முன்னாள் துணை வேந்தர் பேராசிரியர் மு.ஆனந்த கிருஷ்ணனின் முன்னெடுப்பினால் வளர்ச்சியடைந்த இந்த நிறுவனம் இந்தியாவின் தலைசிறந்த ஜிஐஎஸ், ஜியோமேட்டிக்ஸ் ஆய்வு மையங்களில் ஒன்றாகத் திகழ்கிறது.
கடலோர ஒழுங்குமுறை மண்டல (CRZ) வரைபடங்கள், பேரிடர் மேலாண்மை, நகரத் திட்டமிடல், நிலத்தடி நீர் ஆதாரங்களைக் கண்டறிதல் உள்ளிட்ட பல தேசிய முக்கியத்துவம் வாய்ந்த திட்டங்களில் இந்த நிறுவனத்தின் தொழில்நுட்பப் பங்களிப்பு இன்றியமையாததாக உள்ளது.
இந்நிறுவ னத்தின் பங்களிப்பு ஆய்வகங்களோடும் வகுப்பறைகளோடும் நின்றுவிடவில்லை. இங்கு பயின்ற முன்னாள் மாணவர்கள் இஸ்ரோ, இந்திய நில அளவை நிறுவனம் உள்ளிட்ட மத்திய அரசு அமைப்புகளிலும், முன்னணி விண் வெளி, புவியிடத் தொழில்நுட்பம், இடப்பெயர்ச்சி (லாஜிஸ்டிக்ஸ்) நிறுவனங்களிலும் முக்கியப் பொறுப்பு களை வகித்துவருகின்றனர்.
உலகளாவிய வேலைவாய்ப்புகளை வழங்கும் இந்தத் துறைகளை ஒரே வரியில் சுருக்கிச் சொன்னால், பூமியைப் புரிந்துகொள்வது ஜியோடசி; பூமியை அளவிடுவது ஜியோமேட்டிக்ஸ்; சேகரிக்கப்பட்ட தரவுகளைப் பகுப்பாய்வு செய்வது ஜியோ இன்ஃபர் மேட்டிக்ஸ்; அவற்றை வரைபடமாகக் காட்சிப்படுத்தி முடிவெடுக்க உதவுவது ஜிஐஎஸ். எதிர்காலத்தை வடிவமைக்கும் இந்தப் புவியிடத் தொழில்நுட்பத் துறைகளை மாணவர்கள் தவறவிட்டு விடாதீர்கள்!
- கட்டுரையாளர், உயர் கல்வி ஆலோசகர்; ticf@indiacollegefinder.org
此内容由惯性聚合(RSS阅读器)自动聚合整理，仅供阅读参考。 原文来自 — 版权归原作者所有。