Updated on
:
3 min read
சினிமாவில் ஒரு கதாபாத்திரத்தை எவ்வளவு தூரத்தில் காட்டுகிறோம் என்பது அந்த கதாபாத்திரத்துக்கும் பார்வையாளருக்கும் இடையிலான உறவைத் தீர்மானிக்கிறது.
‘லாங் ஷாட்’ என்பது ஒரு நிலப்பரப்பை விவரிக்கிறது; ‘மீடியம் ஷாட்’ என்பது உணர்ச்சிகளைவிவரிக்கிறது. இவை இரண்டுக்கும் இடைப்பட்ட மிக முக்கியமான புள்ளிதான் மீடியம் லாங் ஷாட் -எம்எல்எஸ் (Medium Long Shot - MLS).
ஒரு கதாபாத்திரத்தின் தலையிலிருந்து முழங்கால் வரை (3/4th of the body) காட்டும் இந்த ஷாட், ‘ஃபுல் ஷாட்’ போலக் கால்களையும் தரையையும்முழுமையாகக் காட்டாமல் தவிப்பதே இதன் தனிச்சிறப்பு.
ஏன் மீடியம் லாங் ஷாட் முக்கியமானது?
ஒளிப்பதிவில் ஓர் உருவத்தை வடிவமைக்கும்போது (காம்போசிஷன்), தேவையற்ற இடைவெளிகளைத் தவிர்ப்பது அவசியம். கவனம்: ‘ஃபுல் ஷாட்’ வைக்கும்போது தரையின் பரப்பு அதிகமாகத் தெரியும்.
இது பார்வையாளரின் கவனத்தைச் சிதறடிக்கக்கூடும். ஆனால் எம்எல்எஸ்-ல் முழங்காலுக்குக் கீழ் உள்ள பகுதிகளைத் தவிர்ப்பதன் மூலம், கதா பாத்திரத்தின் முகபாவனைகளும் உடல் மொழியும் இன்னும் தெளிவாகத் தெரியும்.
சுற்றுச்சூழல் : இது ஒரு ‘மீடியம் ஷாட்’ போல மிகவும் நெருக்கமாகவும் இருக்காது. கதாபாத்திரத்தைச் சுற்றியுள்ள நிலப்பரப்பு, பின்னணி மற்றும் சூழல் ஆகியவற்றை இது ஓர் அகன்ற கோணத்தில் உள்வாங்கிக்கொள்ளும்.
ரோஜர் டீக்கின்ஸின் விருப்பமான கோணம்
உலகின் மிகச்சிறந்த ஒளிப்பதிவாளர்களில் ஒருவரான ரோஜர் டீக்கின்ஸ், நீண்ட தூரக் காட்சிகளை விட, மீடியம் லாங் ஷாட்களையே அதிகம் விரும்புகிறார். அவரது கூற்றுப்படி, ஒரு நிலப்பரப்பு எவ்வளவு பிரம்மாண்டமாக இருந்தாலும், அதில் மனிதனின் உணர்ச்சி கலந்து இருக்க வேண்டும்.
‘1917’ அல்லது ‘பிளேடு ரன்னர் 2049’ போன்ற படங்களில் அவர் கதாபாத்திரங்களை எம்எல்எஸ்-ல் வைப்பதன் மூலம், அவர்கள் அந்தப் பிரம்மாண்டமான உலகில் எவ்வளவு சிறியவர்கள் என்பதையும், அதே நேரத்தில் அவர்களின் மனப்போராட்டம் என்ன என்பதையும் ஒரே சட்டகத்தில் கொண்டு வருவார். இது கதாபாத்திரத்தை அந்தச் சூழலோடு ‘ஒட்டவைக்கும்’ ஒரு நுட்பம்.
‘கவுபாய்’ படங்கள் மற்றும் ‘பிளான் அமெரிக்கன்’
மீடியம் லாங் ஷாட்டுக்கு உலக சினிமாவில் மற்றொரு பெயர் உண்டு - ‘பிளான் அமெரிக்கன்’. இது 1940களில் அமெரிக்க ‘வெஸ்டர்ன்’ அல்லது கவுபாய் படங்களில் உருவானது.
‘எ ஃபிஸ்ட்ஃபுல் ஆஃப் டாலர்ஸ்’, ‘த குட்,த பேட் அண்ட் த அக்லி’:
கவுபாய் வீரர்களின் இடுப்பில் இருக்கும் துப்பாக்கி (Holster) தெளிவாகத் தெரிய வேண்டும் என்பதற்காக முழங்கால் வரை காட்டும் இந்த எம்எல்எஸ் கோணத்தைப் பயன்படுத்தினார் இயக்குநர் செர்ஜியோ லியோன்.
வீரர்களின் முகம் மற்றும் அவர்களின் துப்பாக்கி எடுக்கும் வேகம் ஆகிய இரண்டையும் ஒரே நேரத்தில் காட்ட இதுவே சிறந்த வழியாக இருந்தது.
பார்வைகளின் போர்
இரு வீரர்கள் நேருக்கு நேர் மோதிக்கொள்ளும் அந்தப் புகழ்பெற்ற புரொஃபைல் ஷாட்களுக்கு முன்னதாக, அவர்கள் நிற்கும் அந்தத் தோரணையை (Stance) விவரிக்க எம்எல்எஸ் பயன்படுத்தப்பட்டது.
ரோஜர் டீக்கின்ஸ்
ஜேம்ஸ் பாண்ட் மற்றும் ‘ஸ்கைஃபால்’
நவீன சினிமாவில், ஜேம்ஸ் பாண்ட் படமான ‘ஸ்கைஃபாலி’ல் ரோஜர் டீக்கின்ஸ் இந்த எம்எல்எஸ் நுட்பத்தை ஒரு கலையாக மாற்றியிருப்பார். பாண்ட் ஒரு கட்டிடத்தின் உச்சியில் நிற்கும்போதோ அல்லது ஒரு பிரம்மாண்டமான மாளிகைக்கு முன்னால் வரும்போதோ, அவர் எம்எல்எஸ்-ல் காட்டப்படுவார்.
இது பாண்டின் கம்பீரமான ‘சூட்’ மற்றும் அவரது உடல் அமைப்பைச் சிதைக்காமல் காட்டுவதுடன், அந்த இடத்தின் பிரம்மாண்டத்தையும் சேர்த்துப் பிரதிபலிக்கும். இது ஒரு கதாபாத்திரத்தை “ஹீரோவாக” நிலைநிறுத்த உதவும் மிகச்சிறந்த கருவி.
லுக் ரூம், நெகட்டிவ் ஸ்பேஸ் மற்றும்
எம்எல்எஸ் மீடியம் லாங் ஷாட்டை அமைக்கும்போது கவனிக்க வேண்டிய அம்சங்கள்: நெகட்டிவ் ஸ்பேஸ் -ஒரு கதாபாத்திரத்தைச் சுற்றி அதிக நெகட்டிவ் ஸ்பேஸ் விட்டு எம்எல்எஸ் வைக்கும்போது, அவர்கள் அந்தப் பெரிய உலகில் எவ்வளவு தனிமையாக இருக்கிறார்கள் என்ற ‘தனிமை’ உணர்வை உருவாக்கும்.
லுக் ரூம் -கதாபாத்திரம் ஒரு திசையை நோக்கி நகரும்போது, எம்எல்எஸ்-ல் அவருக்கு முன்னால் அதிக இடைவெளி விடுவது, அவர் ஒரு நீண்ட பயணத்தைத் தொடங்குகிறார் என்பதை உணர்த்தும்.
கதைசொல்லலில் இதன் பயன்கள்
ஒளிப்பதிவாளர்கள் எம்எல்எஸ்-ஐப் பயன்படுத்தும் சில முக்கியக் காரணங்கள்:
அதிகாரத்தைக் காட்ட: ஒரு கதாபாத்திரம் அறையின் மையத்தில் எம்எல்எஸ்-ல் நிற்கும்போது, அந்த அறையின் மொத்தக் கட்டுப்பாடும் அவரிடம் இருப்பதை உணர்த்தலாம்.
பின்னணித் தகவல்: ஒரு கதாபாத்திரம் பேசிக்கொண்டிருக்கும்போது, அவருக்குப் பின்னால் நடக்கும் மற்ற விஷயங்களையும் பார்வையாளனுக்கு உணர்த்த இது உதவும்.
தடையற்ற இயக்கம்: ஏற்கெனவே நாம் பார்த்த ‘கட்டிங் ஆன் ஆக் ஷன்’ செய்யும்போது, ஒரு வைட் ஷாட்டிலிருந்து குளோசப்புக்குத் தாவாமல், இடையில் எம்எல்எஸ்-ஐப்பயன்படுத்துவது பார்வையாளரின் கண்களுக்கு இதமாக இருக்கும்.
ஒளிப்பதிவாளர்களுக்கான நுணுக்கம் 3/4 த் ரூல்: மீடியம் லாங் ஷாட் வைக்கும்போது “முழங்கால் மூட்டுகளில்” கட் செய்யக் கூடாது என்பது அடிப்படை விதி.
முழங்காலுக்குச் சற்று மேலே அல்லது கீழே கட் செய்வதே அழகியல் ரீதியாகச் சரியாக இருக்கும். இதுவே அந்த கதாபாத்திரத்தின் உருவத்தைச் சிதைக்காமல் திரையில் காட்டும் ரகசியம்.
சினிமாவின் முழுமையான ஓவியம்
புரொஃபைல் ஷாட்கள் ரகசியங்களைப் பேசுகின்றன, ‘ஸ்மாஷ் கட்’ அதிரடி கொடுக்கிறது. ஆனால், மீடியம் லாங் ஷாட் என்பது கதையின் சூழலை உருவாக்குகிறது. கதாபாத்திரத்தை ஒரு முகமாக மட்டும் பார்க்காமல், அவர் வாழும் உலகின் ஓர் அங்கமாகப் பார்க்க வைப்பதே இந்த ஷாட்டின் வெற்றி.
‘ஸ்கைஃபால்’ முதல் ‘வெஸ்டர்ன்’ படங்கள் வரை, எம்எல்எஸ் என்பது சினிமாவின் வலிமையான காட்சி மொழியாகத் திகழ்கிறது. ஒளிப்பதிவாளர் செதுக்கும் ஒவ்வொரு எம்எல்எஸ்-ம் ஒரு முழுமையான ஓவியம் போலத் திரையில் விரிகிறது.
(புதன்தோறும் ஒளிகாட்டுவோம்)
此内容由惯性聚合(RSS阅读器)自动聚合整理，仅供阅读参考。 原文来自 — 版权归原作者所有。