Updated on:
பிலடெல்பியா: பிஃபா உலகக் கோப்பை கால்பந்து தொடரில் அமெரிக்காவின் பிலடெல்பியா நகரில் உள்ள லிங்கன் ஃபைனான்சியல் ஃபீல்டு மைதானத்தில் நேற்று ‘இ’ பிரிவில் நடைபெற்ற லீக் ஆட்டத்தில் ஐவரி கோஸ்ட் - ஈக்வேடார் அணிகள் மோதின.
போட்டியின் முதல் பாதி ஆட்டம் ரசிகர்களுக்கு அசாத்தியமான விருந்தாக அமைந்தது. முதலில் ஈக்வடார் அணியின் ஜான் எபோவா பெனால்டி பாக்ஸிற்கு வெளியிலிருந்து அடித்த அதிவேக ஷாட், துரதிர்ஷ்டவசமாக கோல்கம்பத்தின் மேல் பட்டு திரும்பியது.
அதைத் தொடர்ந்து அந்த அணியின் பெட்ரோ விதே கொடுத்த துல்லியமான பாஸைப் பெற்ற ஆலன் மிண்டாவிற்கு கோல் அடிக்க பொன்னான வாய்ப்பு கிடைத்தது. கோல்கீப்பர் யாஹியா ஃபொஃபானாவை தாண்டி அவர் வளைத்து அடித்த ஷாட்டும் கோல்கம்பத்தில் பட்டு ஏமாற்றம் அளித்தது.
தொடர்ந்து ஐவரி கோஸ்ட் அணியின் யான் தியோமண்டே வலது பக்கவாட்டில் மின்னல் வேகத்தில் புகுந்து தொடர்ந்து அச்சுறுத்தல் ஏற்படுத்தினார். அதேபோல் அந்த அணியின் வீரர் பாசூமனா துரே அடித்த தாழ்வான ஷாட்டை ஈக்வடார் கோல் கீப்பர் ஹெர்னான் கலின்டெஸ் விரல் நுனியால் தடுத்துக் காப்பாற்றினார்.
முதல் பாதியில் இரு அணிகளின் போராடிய போதிலும் கோல் விழவில்லை. இரண்டாவது பாதியின் தொடக்கத்திலும் வாய்ப்புகள் குவிந்த வண்ணம் இருந்தன. ஈக்வேடாரின் எனர் வலென்சியா குறுகிய கோணத்திலிருந்து அடித்த ஷாட் கோல் கம்பத்தில் மோதியது. அடுத்ததாக ஐவரி கோஸ்ட் அணியின் வீரர் வாஹி அடித்த ஷாட் துரதிர்ஷ்டவசமாக உயரமாகச் சென்று கோல் கம்பத்தில் பட்டுத் தெறித்தது.
ஆட்டத்தின் பிற்பகுதியில் ஈக்வடார் பின்வாங்கியதைத் தொடர்ந்து, பந்தை அதிக நேரம் தன் வசம் வைத்து ஆட்டத்தை ஐவரி கோஸ்ட் முழுமையாகக் கட்டுப்படுத்தத் தொடங்கியது. அவர்களின் இந்தத் தொடர் முயற்சிக்கு ஆட்டத்தின் இறுதி நிமிடத்தில் பலன் கிடைத்தது.
90-வது நிமிடத்தில் ஐவரி கோஸ்ட் அணியின் வீரர் சிங்கோ எந்தவொரு தடையும் இல்லாமல் வலது பக்கவாட்டில் மிக வேகமாக முன்னேறிச் சென்று பாக்ஸின் விளிம்பு பகுதியில் இருந்து அடித்த பந்து பெனால்டி பாக்ஸ் பகுதிக்குள் காத்திருந்த பதிலி வீரரான அமத் டயாலோ வசம் சென்றது. பந்தை பெற்ற அமத் டயாலோ, இடது காலால் அடித்த ஷாட், ஈக்வேடார் கோல்கீப்பர் ஹெர்னான் கலின்டெஸ் பாய்ந்து தடுத்தும் கோல் வலைக்குள் புகுந்தது.
இதனால் ஐவரி கோஸ்ட் அணி 1-0 என்ற கோல் கணக்கில் முன்னிலை பெற்றது. இதன் பின்னர் காயங்களுக்கு இழப்பீடாக வழங்கப்பட்ட 9 நிமிடங்களில் ஈக்வேடார் அணியை பதிலடி கொடுக்க விடாமல் பார்த்துக் கொண்டனர் ஐவரி கோஸ்ட் அணியின் வீரர்கள். முடிவில் ஐவரி கோஸ்ட் 1-0 என்ற கோல் கணக்கில் வெற்றி பெற்றது.
12 வருடங்களுக்கு பிறகு உலகக் கோப்பை தொடருக்கு தகுதி பெற்றுள்ள ஐவரி கோஸ்ட் அணி தனது பயணத்தை வெற்றியுடன் தொடங்கி உள்ளது. ஐவரி கோஸ்ட் அணி தனது அடுத்த ஆட்டத்தில் 4 முறை சாம்பியனான ஜெர்மனியுடன் வரும் 20-ம் தேதி மோதுகிறது. அன்றைய தினத்தில் நடைபெறும் மற்றொரு ஆட்டத்தில் ஈக்வேடார் அணி, குராசாவோ அணியை சந்திக்கிறது.
22 மாதங்களில் முதல் தோல்வி
நடப்பு பிஃபா உலகக் கோப்பை கால்பந்து தொடரில் ஐவரி கோஸ்ட் அணியிடம் 1-0 என்ற கோல் கணக்கில் ஈக்வேடார் தோல்வி அடைந்தது.
இதன் மூலம் அந்த அணி கடந்த 19 போட்டிகளில் தோல்வி அடையாமல் வலம் வந்த சாதனை முடிவுக்கு வந்தது. ஈக்வேடார் அணி கடைசியாக 2024-ம் ஆண்டு செப்டம்பர் 6-ல் பிரேசில் அணியிடம் தோல்வி கண்டிருந்தது. இதன் பின்னர் 22 மாதங்களுக்குப் பிறகு தற்போது ஐவரி கோஸ்ட் அணியிடம் வீழ்ந்துள்ளது.
此内容由惯性聚合(RSS阅读器)自动聚合整理，仅供阅读参考。 原文来自 — 版权归原作者所有。