Updated on:
சென்னை: தமிழக அரசு மூடிய 717 டாஸ்மாக் கடைகளின் பட்டியலை, மதுவிலக்கு மற்றும் ஆயத்தீர்வை துறை அமைச்சர் விக்னேஷ் வெளியிட்டார்.
தமிழகத்தில் 4,765 டாஸ்மாக் மதுபான சில்லறை விற்பனை கடைகள் இயங்கி வந்த நிலையில், தமிழக முதல்வராக விஜய் பொறுப்பெற்ற பின், வழிபாட்டு தலங்கள், கல்வி நிறுவனங்கள், போக்குவரத்து முனையங்கள் அருகில் இருக்கும் 717 டாஸ்மாக் கடைகளை மூட உத்தரவிட்டார்.
இதையடுத்து, அத்தகைய கடைகளை மூடும் பணி மேற்கொள்ளப்பட்டு வந்தது. இதற்கிடையே, தமிழக பாஜக தலைவர் நயினார் நாகேந்திரன், ‘அரசால் மூடப்பட்டதாக அறிவிக்கப்பட்ட கடைகள் குறித்து தகவல் அறியும் உரிமை சட்டத்தில் கேட்டபோது, அதை வெளியிட அரசு மறுப்பதாக குற்றம்சாட்டினார்.
இந்நிலையில், அரசு அறிவிப்பின்படி 717 கடைகள் மூடப்பட்டதாக மதுவிலக்கு மற்றும் ஆயத்தீர்வை துறை அமைச்சர் விக்னேஷ் தெரிவித்துள்ளார். மேலும், மூடப்பட்ட கடைகளின் பட்டியலையும் வெளியிட்டுள்ளார்.
அதில் கடைகளின் எண், எந்த மாவட்டத்தில் மற்றும் மண்டலத்தில், மொத்தம் எத்தனை கடைகள் மூடப்பட்டுள்ளன என்ற தகவல்கள் இடம்பெற்றுள்ளன. அதன்படி, மதுரை மண்டலத்தில் அதிகபட்சமாக 290 கடைகள் மூடப்பட்டுள்ளன.
இந்த மண்டலத்தில் தூத்துக்குடி மாவட்டத்தில் 63 கடைகளும், விருதுநகர் மாவட்டத்தில் 42 கடைகளும், மதுரை தெற்கில் 39, திருநெல்வேலி 33, ராமநாதபுரத்தில் 29, திண்டுக்கல்லில் 25, சிவகங்கையில் 18, மதுரை வடக்கு 13, கன்னியாகுமரியில் 15, தேனியில் 12 கடைகள் மூடப்பட்டுள்ளன.
கோவை மண்டலத்தில் 179 கடைகள் மூடப்பட்டுள்ளன. இந்த மண்டலத்தில் கோவை வடக்கில் 48, ஈரோட்டில் 42, திருப்பூரில் 31, நீலகிரியில் 27, கோவை தெற்கில் 23, கரூரில் 8 கடைகள் மூடப்பட்டுள்ளன.
சென்னை மற்றும் சேலம் மண்டலங்களில் தலா 82 கடைகள் மூடப்பட்டுள்ளன. சென்னை மண்டலத்தில் திருவள்ளூர் கிழக்கில் 27 கடைகள், வடசென்னை 13, காஞ்சிபுரம் வடக்கு 10, தென் மற்றும் மத்திய சென்னையில்தலா 9, காஞ்சிபுரம் தெற்கு 8, திருவள்ளூர் மேற்கு 6 கடைகள் மூடப்பட்டுள்ளன.
சேலம் மண்டலத்தில் சேலம் மாவட்டத்தில் 22, திருவண்ணாமலை 19, நாமக்கல் 14, வேலூரில் 6, அரக்கோணம், கிருஷ்ணகிரி, தருமபுரியில் தலா 7 கடைகள் மூடப்பட்டுள்ளன. திருச்சி மண்டலத்தில் 84 கடைகள் மூடப்பட்டுள்ளன.
இந்த மண்டலத்தில் கடலூரில் 21, புதுக்கோட்டையில் 17, திருச்சியில் 15, விழுப்புரத்தில் 9, நாகையில் 4, திருவாரூர், தஞ்சை, பெரம்பலூரில் தலா 6 கடைகள் மூடப்பட்டுள்ளன.
此内容由惯性聚合(RSS阅读器)自动聚合整理，仅供阅读参考。 原文来自 — 版权归原作者所有。