Updated on
:
1 min read
ஸ்டாக்ஹோம்/ஓஸ்லோ: பிரதமர் நரேந்திர மோடிக்கு சுவீடன், நார்வே நாடுகளின் உயரிய விருதுகள் வழங்கப்பட்டு உள்ளன.
கடந்த 17-ம் தேதி பிரதமர் மோடி சுவீடன் நாட்டுக்கு சென்றார். அந்த நாட்டின் கோதன்பர்க் நகரில் நடைபெற்ற விழாவில் பட்டத்து இளவரசி விக்டோரியாவை அவர் சந்தித்துப் பேசினார். அப்போது அவருக்கு சுவீடனின் மிக உயரிய விருதுகளில் ஒன்றான 'ராயல் ஆர்டர் ஆப் தி போலார் ஸ்டார், டிகிரி கமாண்டர் கிராண்ட் கிராஸ்' வழங்கப்பட்டது. பட்டத்து இளவரசி விக்டோரியா விருதை வழங்கி கவுரவித்தார்.
கடந்த 18-ம் நூற்றாண்டில் இந்த விருது தோற்றுவிக்கப்பட்டது. வெளிநாட்டு தலைவர்களின் சிறந்த பொதுச்சேவைக்காகவும், சுவீடன் உடனான உறவை வலுப்படுத்துவதில் அவர்கள் ஆற்றிய பங்களிப்பிற்காகவும் இவ்விருது வழங்கப்பட்டு வருகிறது. இந்த விருதைப் பெற்ற முதல் ஆசியத் தலைவர் என்ற பெருமையை பிரதமர் நரேந்திர மோடி பெற்றிருக்கிறார். அவர் கூறும்போது, ‘‘பட்டத்து இளவரசி விக்டோரியாவுக்கும் சுவீடன் மக்களுக்கும் நன்றி. இந்த விருதை 140 கோடி இந்திய மக்களுக்கும், இந்தியா – சுவீடன் நாடுகளுக்கு இடையேயான நீண்ட கால நட்புக்கும் அர்ப்பணிக்கிறேன்.
இரு நாடுகளுக்கு இடையே உள்ள வரலாற்று மற்றும் கலாச்சாரப் பிணைப்பை விருது உறுதிப்படுத்துகிறது. இரு நாட்டு மக்களிடையே நீடிக்கும் அன்புக்கும் சான்றாக அமைந்துள்ளது’’ என்று தெரிவித்தார்.சுவீடன் பயணத்தை நிறைவு செய்த பிரதமர் நரேந்திர மோடி நேற்று நார்வே தலைநகர் ஓஸ்லோ சென்றார். அங்கு அந்த நாட்டு மன்னர் ஐந்தாம் ஹரால்டை அவர் சந்தித்துப் பேசினார். அப்போது நார்வே நாட்டின் மிக உயரிய ‘‘ராயல் நார்வேஜியன் ஆர்டர் ஆஃப் மெரிட்டின் கிராண்ட் கிராஸ்’’ விருதை பிரதமர் மோடிக்கு மன்னர் ஹரால்டு வழங்கினார்.
இதுகுறித்து பிரதமர் நரேந்திர மோடி சமூக வலைதளத்தில் வெளியிட்ட பதிவில், “இந்த விருதைப் பெறுவதில் மிகுந்த பெருமிதம் கொள்கிறேன். இதை இந்திய மக்களுக்கு அர்ப்பணிக்கிறேன். இந்தியா, நார்வே இடையிலான நட்புறவுக்கு விருது சான்றாக விளங்குகிறது. உலக நாடுகளின் முன்னேற்றத்துக்காக இரு நாடுகளும் ஒன்றிணைந்து செயல்படுகின்றன. இந்த அர்ப்பணிப்பு உணர்வையும் விருது பிரதிபலிக்கிறது’’ என்றார்.
அமெரிக்கா, ரஷ்யா, ஐரோப்பிய நாடுகள், வளைகுடா நாடுகள் உட்பட உலகின் பல்வேறு நாடுகள் பிரதமர் நரேந்திர மோடிக்கு உயரிய விருதுகளை வழங்கி உள்ளன. நார்வே வழங்கிய விருதையும் சேர்த்து அவர் இதுவரை 32 சர்வதேச விருதுகளைப் பெற்றுள்ளார்.
此内容由惯性聚合(RSS阅读器)自动聚合整理，仅供阅读参考。 原文来自 — 版权归原作者所有。