Updated on:
மாட்ரிட்: அடுத்த மாதம் தொடங்கும் ஃபிபா உலகக் கோப்பை கால்பந்து (2026) தொடருக்கான ஸ்பெயின் அணி அறிவிக்கப்பட்டுள்ளது. இதில் இளம் வீரர் லாமைன் யமால் இடம்பிடித்து அசத்தி உள்ளார்.
வரும் ஜூன் 11 முதல் ஜூலை 19 வரை இந்த தொடர் திட்டமிடப்பட்டுள்ளது. அமெரிக்கா, கனடா மற்றும் மெக்சிகோ நாடுகளில் இந்த தொடர் நடைபெறுகிறது. மொத்தம் 48 அணிகள் இந்த தொடரில் பங்கேற்று விளையாடுகின்றன. 39 நாட்கள் நடைபெறும் இந்த தொடரில் 104 போட்டிகள் விளையாடப்பட உள்ளது.
இதில் குரூப் சுற்று போட்டிகள் ஜூன் 11 முதல் 27-ம் தேதி வரையில் நடைபெறுகிறது. நாக்-அவுட் சுற்றான ‘ரவுண்ட் ஆப் 32’ சுற்று ஜூன் 29 முதல் ஜூலை 3 வரை நடைபெறுகிறது. அதன் பின்னர் காலிறுதி மற்றும் அரையிறுதி ஆட்டங்கள் ஜூலை 4 முதல் 11-ம் தேதி வரையில் திட்டமிடப்பட்டுள்ளது. இறுதிப் போட்டி ஜூலை 19-ம் தேதி அன்று அமெரிக்காவின் நியூ ஜெர்ஸியில் நடைபெறுகிறது.
இரண்டாவது உலக சாம்பியன் பட்டத்தை நோக்கி ஸ்பெயின்: ஐரோப்பிய நாடுகளில் ஒன்றான ஸ்பெயின், கால்பந்து விளையாட்டில் ஆதிக்கம் செலுத்தும் நாடுகளில் ஒன்றாக உள்ளது. ஸ்பெயின் நடைபெறும் ‘லா லிகா’ கால்பந்து தொடர் உலக அளவில் பிரபலமான தொடராக அமைந்துள்ளது. கடந்த 1934 முதல் உலகக் கோப்பை தொடரில் ஸ்பெயின் பங்கேற்று வருகிறது. நடப்பு தொடரையும் சேர்த்து 17-வது முறையாக உலகக் கோப்பையில் களம் காண்கிறது.
கடந்த 2010-ல் சாம்பியன் பட்டத்தை வென்றிருந்தது. அதன் பிறகு 2014-ல் குரூப் சுற்று, 2018 மற்றும் 2022-ல் ‘ரவுண்ட் ஆப் 16’ வரை ஸ்பெயின் முன்னேறியது. இந்த முறை சாம்பியன் பட்டம் வெல்லும் முனைப்பில் களம் காண்கிறது. நடப்பு யூரோ சாம்பியன் (2024), நேஷன்ஸ் லீக் தொடரில் இரண்டாம் இடம் பிடித்துள்ளது. அந்த நம்பிக்கையில் ஸ்பெயின், உலகக் கோப்பை தொடரில் விளையாடுகிறது.
நடப்பு உலகக் கோப்பை தொடரில் ஸ்பெயின் அணி குரூப் - ‘ஹெச்’ பிரிவில் இடம்பெற்றுள்ளது. இந்த பிரிவில் கேப் வர்டி, உருகுவே, சவூதி அரேபியா உள்ளிட்ட அணிகள் இடம்பெற்றுள்ளன. இந்த தொடருக்காக 26 வீரர்கள் அடங்கிய அணியை அறிவித்துள்ளது ஸ்பெயின் கால்பந்து நிர்வாகம்.
இதில் இளம் வீரர் யமால் இடம்பெற்றுள்ளார். அதேபோல லா லிகா தொடரில் முக்கிய அணியான ரியல் மாட்ரிட் அணியில் இடம்பெற்றுள்ள ஸ்பெயின் வீரர்கள் யாரும் உலகக் கோப்பை தொடருக்கான இந்த அணியில் இடம்பெறவில்லை. இது இப்போது பேசு பொருளாகி உள்ளது.
ஸ்பெயின் அணி விவரம்
>>கோல்கீப்பர்கள்: சிமோன், டேவிட் ராயா, ஜோன் கார்சியா
>>டிஃபெண்டர்கள்: குர்குரே, கிரிமால்டோ, குபார்ஸி, லபோர்தா, பியூபில், எரிக் கார்சியா, மார்கோஸ் லொரெண்டே, போரோ
>>மிட்ஃபீல்டர்கள்: பெத்ரி, ரூயிஸ், மார்ட்டின் ஜூபிமெண்டி, கேவி, ரோட்ரி, அலெக்ஸ் பேனா, மைக்கேல் மெரினோ, மைக்கேல் ஒர்சபால்
>>முன்கள வீரர்கள்: டேனி ஒல்மோ, நிகோ வில்லியம்ஸ், பினோ, ஃபெரான் டோரஸ், போர்ஜா இக்லேசியாஸ், விக்டர் முனோஸ், லாமைன் யமால்
此内容由惯性聚合(RSS阅读器)自动聚合整理，仅供阅读参考。 原文来自 — 版权归原作者所有。