Updated on:
2026 பிஃபா உலகக் கோப்பையின் 14-வது நாள் போட்டிகள் முடிவடைந்த நிலையில், ஏ, பி, சி ஆகிய மூன்று குழுக்களின் லீக் சுற்று நிறைவுக்கு வந்தது. இதில் மெக்சிகோ, பிரேசில், சுவிட்சர்லாந்து ஆகியவை தங்கள் குழுக்களில் முதலிடம் பிடித்து அடுத்த சுற்றுக்கு முன்னேறின. தென் ஆப்பிரிக்கா உலகக் கோப்பை வரலாற்றில் முதல் முறையாக நாக்-அவுட் சுற்றுக்கு தகுதி பெற்றது.
குழு நிலவரம்: குழு பி-யில் சுவிட்சர்லாந்து முதலிடம் பிடித்தது. கனடா இரண்டாவது இடத்தில் தகுதி பெற்றது. போஸ்னியா மற்றும் ஹெர்சகோவினா மூன்றாவது இடத்தில் இருந்தாலும் அடுத்த கட்டத்துக்கு செல்லும் வாய்ப்பை தக்க வைத்துள்ளது. கத்தார் வெளியேறியது.
குழு சி-யில் பிரேசில் முதலிடத்தையும், மொராக்கோ இரண்டாவது இடத்தையும் கைப்பற்றின. ஸ்காட்லாந்து மூன்றாவது இடத்தில் இருந்து பிற குழுக்களின் முடிவுகளை எதிர்பார்த்து காத்திருக்கிறது. ஹெய்டி வெளியேறியது.
குழு ஏ-யில் மெக்சிகோ முதலிடத்தை உறுதி செய்தது. தென் ஆப்பிரிக்கா இரண்டாவது இடத்தில் தகுதி பெற்றது. தென் கொரியா மூன்றாவது இடத்தில் இருந்து மற்ற குழுக்களின் முடிவுகளை எதிர்பார்த்து காத்திருக்கிறது. செக்கியா வெளியேறியது.
பிரேசில் 3-0 ஸ்காட்லாந்து: வினிசியஸ் ஜூனியரின் இரட்டை கோல் அசத்தல்
குழு சி-யில் பிரேசில் 3-0 என்ற கோல் கணக்கில் ஸ்காட்லாந்தை எளிதாக வீழ்த்தி முதலிடத்தை கைப்பற்றியது. வினிசியஸ் ஜூனியர் இரண்டு கோல்கள் அடித்து ஆட்டநாயகனாக திகழ்ந்தார்.
ஏழாவது நிமிடத்தில் ஸ்காட் மெக்கென்னாவின் தவறை பயன்படுத்திய ரயன், வினிசியஸுக்கு வாய்ப்பை உருவாக்கினார். கோல்கீப்பரை கடந்து வினிசியஸ் முதல் கோலை அடித்தார்.
முதல் பாதி கூடுதல் நேரத்தில் புரூனோ கிமராஸ் வழங்கிய அழகான பாஸை வினிசியஸ் ஹெடரில் கோலாக மாற்றி தனது இரண்டாவது கோலை பதிவு செய்தார்.
60-வது நிமிடத்தில் மேத்யூஸ் குன்யா மூன்றாவது கோலை அடித்தார். இறுதியில் பயிற்சியாளர் கார்லோ அன்சலோட்டி, நெய்மர் ஜூனியரை மாற்று வீரராக களமிறக்கி ரசிகர்களை உற்சாகப்படுத்தினார்.
மெக்சிகோ 3-0 செக்கியா
குழு ஏ-யின் கடைசி போட்டியில் மெக்சிகோ 3-0 என்ற கோல் கணக்கில் செக்கியாவை வீழ்த்தி முதலிடத்தை உறுதி செய்தது. செக்கியா ஒரு புள்ளியுடன் கடைசி இடத்தில் முடித்து தொடரிலிருந்து வெளியேறியது.
போட்டியின் எட்டாவது நிமிடத்தில் டெனிஸ் விஸின்ஸ்கியின் முயற்சி நூலிழையில் கோல் இலக்கைத் தவற விட்டது. முதல் பாதி கோல் இன்றியே முடிந்தது.
55-வது நிமிடத்தில் வேகமான எதிர் தாக்குதலின் முடிவில் மேட்டியோ சாவேஸ் அற்புதமாக பந்தை வலைக்குள் செலுத்தினார். அதன்பின் 61-வது நிமிடத்தில் ஜூலியன் கின்யோனஸ் பாக்ஸில் ஏற்பட்ட குழப்பத்தை பயன்படுத்தி இரண்டாவது கோலை அடித்தார்.
காய நேரத்தின் நான்காவது நிமிடத்தில் ஆல்வாரோ பிடால்கோ மூன்றாவது கோலை அடித்து வெற்றிக்கு மெருகூட்டினார். மெக்சிகோ அணிக்காக கில்லெர்மோ ஓச்சோவா மாற்று வீரராக களமிறங்கி வரலாற்றுச் சாதனையை படைத்தார்.
கொரியாவை வீழ்த்தி தென் ஆப்பிரிக்கா வரலாறு
தென் ஆப்பிரிக்கா 1-0 என்ற கோல் கணக்கில் தென் கொரியாவை வீழ்த்தி உலகக் கோப்பை நாக்-அவுட் சுற்றுக்கு முதல் முறையாக தகுதி பெற்றது.
ஆட்டத்தின் தொடக்கத்திலேயே கிம் மின்-ஜேவின் ஹெடர் கோல் லைனில் தடுக்கப்பட்டது. லீ காங்-இன் ஆட்டத்தின் எட்டாவது நிமிடத்தில் கோல் அடிக்கும் வாய்ப்பை தவறவிட்டார்.
ஆனால் போட்டியின் ஓட்டம் மெல்ல தென் ஆப்பிரிக்காவுக்கு சாதகமாக மாறியது. 63-வது நிமிடத்தில் ச்ஷேபாங் மோரேமியின் அற்புத பாஸை பெற்ற தாபேலோ மசேகோ கீழ் மூலையில் பந்தை வலைக்குள் அனுப்பி வெற்றிக்கோலை அடித்தார்.
இறுதி வரை போராடிய தென் கொரியா சமநிலை கோலை பெற முடியவில்லை. இதனால் மூன்று புள்ளிகளுடன் மூன்றாவது இடத்தில் முடித்த அவர்கள் பிற குழுக்களின் முடிவுகளை காத்திருக்க வேண்டிய நிலைக்கு தள்ளப்பட்டனர்.
மொராக்கோ 4-2 ஹெய்டி: இருமுறை பின் தங்கி மீண்டெழுந்தது!
மொராக்கோ 4-2 என்ற கோல் கணக்கில் ஹெய்டியை வீழ்த்தி குழு சி-யில் இரண்டாவது இடத்தை உறுதி செய்தது. ஹெய்டி இருமுறை முன்னிலை பெற்ற போதிலும், மொராக்கோ மீண்டு வந்து வெற்றி பெற்றது.
10-வது நிமிடத்தில் லென்னி ஜோசப் அடித்த பந்து கோல்கீப்பர் யாசின் புனோவின் உடலில் பட்டு வலைக்குள் சென்றதால் ஹெய்டி முன்னிலை பெற்றது. அதாவது இது ஓன் கோல்.
39-வது நிமிடத்தில் அக்ராஃப் ஹகிமி சமநிலை கோலை அடித்தார். ஆனால் 43-வது நிமிடத்தில் வில்சன் இசிடோர் தொலைதூரத்திலிருந்து அசத்தலான ஷாட்டில் ஹெய்டியை மீண்டும் முன்னிலை பெறச் செய்தார்.
முதல் பாதி கூடுதல் நேரத்தில் சாய்பாரி வெளிப்புறத்திலிருந்து துல்லியமாக அடித்து மீண்டும் சமநிலையை ஏற்படுத்தினார்.
இரண்டாம் பாதியில் மொராக்கோ முழுமையாக ஆட்டத்தை கட்டுப்படுத்தியது. 78-வது நிமிடத்தில் மாற்று வீரர் சூஃபியான் ரஹிமி மூன்றாவது கோலை அடித்தார். 89-வது நிமிடத்தில் கெசிம் யாசின் நான்காவது கோலை பதிவு செய்து வெற்றியை உறுதி செய்தார்.
14-வது நாள் போட்டிகளுக்குப் பிறகு மெக்சிகோ, பிரேசில், சுவிட்சர்லாந்து ஆகியவை தங்கள் குழுக்களில் சாம்பியன்களாக அடுத்த சுற்றுக்கு முன்னேறின. தென் ஆப்பிரிக்கா தனது உலகக் கோப்பை வரலாற்றில் முதல் முறையாக நாக்-அவுட் சுற்றில் இடம்பிடித்தது. இதேவேளை தென் கொரியா மற்றும் ஸ்காட்லாந்து அணிகள் பிற குழுக்களின் முடிவுகளை எதிர்பார்த்து காத்திருக்கின்றன.
此内容由惯性聚合(RSS阅读器)自动聚合整理，仅供阅读参考。 原文来自 — 版权归原作者所有。