பேரி லிண்டன்...
Updated on:
நிலப்பரப்பு என்பது ‘மிஸ்-என்-சீன்’ (Mise-en-scene) இன் மிக முக்கியமான அங்கமாகும். இது கதாபாத்திரத்தின் உளவியல், காட்சியின் வேகம் மற்றும் கதையின் ஒட்டுமொத்தத் தன்மையையும் வடிவமைப்பதோடு படத்தின் உணர்ச்சி நிலையையும் (Emotional Temperature) அளவிடும் கருவி.
நிலப்பரப்பு: ஓர் உயிருள்ள கதாபாத்திரம் பல சிறந்த திரைப்படங்களில், சூழல் என்பது ஒரு மனிதனைப் போலவே வினைபுரிகிறது. இது கதாபாத்திரத்தைச் சூழ்ந்து நிற்பதோடு அவர்களோடு உரையாடுகிறது.
பிரிட்ஜ் ஆன் த ரிவர் குவாய்
இயக்குநர் டேவிட் லீன் இயக்கிய இந்தத் திரைப்படம், நிலப்பரப்பு ஒரு கதையை எப்படி வழிநடத்தும் என்பதற்குச் சான்று. இந்தப் படத்தின் கதை தாய்லாந்தில் நடப்பதாக இருந்தாலும், இதன் படப்பிடிப்பு முழுவதும் இலங்கையில் நடைபெற்றது.
இலங்கையின் கிதுல்கல பகுதியில் உள்ள கேலனி ஆற்றின் குறுக்கே, படத்துக்காகவே ஒரு பாலம் கட்டப்பட்டது. அடர்ந்த மழைக்காடுகள் சூழ்ந்த இந்தப் பகுதி, தென்கிழக்கு ஆசியாவின் போர்ச் சூழலைத் தத்ரூபமாகப் பிரதிபலித்தது.
ஒளிப்பதிவாளர் ஜாக் ஹில்யார்ட், காட்டின் இடுக்குகளின் வழியே ஊடுருவும் இயற்கை ஒளியைப் பயன்படுத்தி, ஒழுங்குக்கும் (பாலம்) குழப்பத்துக்கும் (போர் மற்றும் இயற்கை) இடையிலான மோதலை அழகாகக் காட்டினார்.
ஒரு தலைமுறையை உருவாக்கிய நிலப்பரப்பு
இந்தத் திரைப்படத்தின் படப்பிடிப்பு இலங்கையில் நடந்தபோது, அதை நேரில் பார்க்கும் வாய்ப்பு ஓர் இளைஞனுக்குக் கிடைத்தது. அந்தப் பிரம்மாண்டமான நிலப்பரப்பும், ஒரு பாலத்தையே உருவாக்கி அதனைப் படமாக்கிய விதமும் அந்த இளைஞனை வியப்பில் ஆழ்த்தியது.
அவர்தான் பிற்காலத்தில் இந்திய சினிமாவின் ஆகச்சிறந்த ஒளிப்பதிவாளர் மற்றும் இயக்குநராகத் திகழ்ந்த பாலுமகேந்திரா. அந்த நிலப்பரப்பும், படப்பிடிப்புத் தளத்தின் நேர்த்தியும்தான் அவரை திரைக்கலைஞனாக மாற்றிய விதை.
சைக்கோ: அச்சுறுத்தும் நிலப்பரப்பு
சைக்கோ (1960): ஆல்ஃபிரட் ஹிட்ச்காக்கின் இந்தப் படத்தில் வரும் அந்த ‘பேட்ஸ் ஹவுஸ்’ ஒரு மேட்டின் மீது தனித்து நிற்கும் விதம், அதன் நிலப்பரப்பு சார்ந்த இருப்பிடம் ஒருவிதமான அச்சுறுத்தலை உருவாக்குகிறது. அந்த வீட்டின் நிலப்பரப்பு அமைப்பு, நார்மன் பேட்ஸின் சிதைந்த மனநிலையின் குறியீடாகவே செயல்படுகிறது.
காட்சி அமைப்பு மற்றும் ஃபிரேமிங்
ஒரு நிலத்தின் புவியியல் அமைப்பே, கேமரா கோணங்களைத் தீர்மானிக்கிறது.
பரந்த நிலங்கள்: மனித உருவத்தைச் சிறியதாகக் காட்டி, இயற்கையின் பிரம்மாண்டத்தை உணர்த்தும் ‘லாங் ஷாட்கள்’ (Long shots).
குறுகிய நகர வீதிகள்: நெருக்கமான பிரேம்கள் (Tight frames) மூலம் மூச்சுத்திணறல் அல்லது அழுத்தம் (Claustrophobia) போன்ற உணர்வுகளை உருவாக்குதல்.
உளவியல் பிரதிபலிப்பு
கதாபாத்திரத்தின் அக உலகை, நிலப்பரப்பு கண்ணாடியாகப் பிரதிபலிக்கிறது.
கும்கி: அந்த உயரமான நீர்வீழ்ச்சியும் (Jog Falls), அடர்ந்த காடும் ஒரு காதலின் பிரம்மாண்டத்தையும், அதே நேரம் அதன் ஆபத்தையும் உணர்த்தின. புயல் என்பது மனப்போராட்டத்தின் குறியீடு. அமைதியான கடல் தற்காலிகமான அமைதியை அல்லது மாயையை உணர்த்துகிறது.
பிரிட்ஜ் ஆன் த ரிவர் குவாய்...
ஒலி வடிவமைப்பு மற்றும் அசைவுகள்
ஒவ்வொரு நிலப்பரப்புக்கும் ஒரு தனித்துவமான சத்தம் உண்டு. வயல்களில் வீசும் காற்றின் சத்தம், நகரத்தின் போக்குவரத்து இரைச்சல், பனியில் நிலவும் நிசப்தம்- இவை அனைத்தும் பார்வையாளரை அந்த உலகுக்குள்ளே கொண்டு செல்கின்றன. அதேபோல, மணலில் நடப்பது ஒரு போராட்டமாகவும் சரிவுகளில் நடப்பது ஒரு டைனமிக் அசைவாகவும் மாறும்.
பேரி லிண்டன்: ஓவியமாக விரிந்த நிலப்பரப்பு
ஸ்டான்லி குப்ரிக்கின் இந்தப் படம் அயர்லாந்தின் பசுமையான நிலப்பரப்புகளை அப்படியே ஒரு எண்ணெய் ஓவியமாக மாற்றியது. பகல் காட்சிகளில் நிலவும் மென்மையான மேக மூட்டத்தையும், இயற்கை ஒளியையும் ஒளிப்பதிவாளர் ஜான் அல்காட் கையாண்ட விதம், அந்த காலக்கட்டத்தின் வாழ்வியலைக் காட்டியது.
பழக்கமான மற்றும் அந்நியமான நிலப்பரப்பு
திரைக்கதையில் நிலப்பரப்பின் தாக்கம் இருவேறு கோணங்களில் செயல்படுகிறது. ஒரு கதாபாத்திரத்தை அதன் சொந்த நிலத்தில் காட்டும்போது அது அந்தக் கதாபாத்திரத்தின் அதிகாரத்தையும், வேரூன்றிய கலாச்சாரத்தையும் காட்டுகிறது.
பாண்டிச்சேரி வீதிகளிலோ அல்லது மதுரையிலோ ஒரு கதை நடக்கும்போது, அந்த நிலப்பரப்பு கதாபாத்திரத்துக்கு ஒரு ‘பாதுகாப்பு’ உணர்வைத் தரும். ஒரு கதாபாத்திரத்தை அதற்கு முற்றிலும் பழக்கமில்லாத, ஆபத்தான நிலப்பரப்பில் வீசும்போது அந்த நிலமே வில்லனாக மாறுகிறது.
அஜர்பைஜான் போன்ற அந்நிய நிலப்பரப்பில் ஒரு கதை நடக்கும் போது, மொழி தெரியாத சூழலும், பழகாத புவியியல் அமைப்பும் இணைந்து ‘விடாமுயற்சி’ திரைப்படத்தில் கதாபாத்திரத்தின் பதற்றத்தை பலமடங்கு உயர்த்துகிறது. இங்கே நிலப்பரப்பு என்பது சிக்கலான ‘மேஸ்’ (Maze) போலச் செயல்பட்டு, தப்பிக்க முடியாத உணர்வைத் தருகிறது.
இந்தி சினிமாவும் ஸ்விட்சர்லாந்தும்
இந்தியாவின் வெப்பமான சூழலுக்கு நேர்மாறாக, சுவிட்சர்லாந்தின் பனி படர்ந்த மலைகளையும், பூத்துக்குலுங்கும் புல்வெளிகளையும் காதலின் குறியீடாக மாற்றினார் யஷ் சோப்ரா. இந்தியப் பார்வையாளர்களுக்கு அது ஒரு ‘கனவு நிலப்பரப்பாக’ மாறியது. அங்குள்ள குளிர்ச்சியான நீல நிறமும், வெண்மையும் காதலின் தூய்மையைப் பிரதிபலிக்கப் பயன்படுத்தப்பட்டன
அபூர்வமான சிறந்த படங்கள் மற்றும் நிலப்பரப்பு
அதிகம் பேசப்படாத, ஆனால் சிறந்த நிலப்பரப்பு பயன்பாட்டைக் கொண்ட சில படங்கள்:
தி மெசினிஸ்ட் (The Machinist): அந்தத் தொழிற்சாலை மற்றும் நகர்ப்புற நிலப்பரப்பு ஒரு மனிதனின் குற்ற உணர்ச்சியையும் சிதைந்த மனநிலையையும் சாம்பல் நிறத்தில் பிரதிபலிக்கும்.
விண்ட் ரிவர் (Wind River): பனி அடர்ந்த நிலப்பரப்பு ஒரு கொலையின் மர்மத்தை மட்டுமல்ல, அங்கு வாழும் மக்களின் தனிமையையும் மிக அழகாகக் காட்டியது.
நிலப்பரப்பு ஒளிப்பதிவு என்பது ஒரு ஒழுக்கத்தைக் கோருகிறது. மேகங்கள் நகர்வதற்காகக் காத்திருப்பது, சரியான சூரியக் கோணத்தைப் படம்பிடிப்பது என ஒளிப்பதிவாளர் ஒரே நேரத்தில் கவிஞனாகவும், விஞ்ஞானியாகவும் சிந்திக்க வேண்டும்.
ஓர் இயக்குநர் நிலப்பரப்பைத் தேர்ந்தெடுக்கும்போது கேட்க வேண்டிய கேள்வி இதுதான்: “இந்த இடம் எனது கதைக்கு என்ன செய்கிறது - இது வெறும் கதை நடக்கும் இடம் மட்டும்தானா?"
(புதன்தோறும் ஒளிகாட்டுவோம்)
- cjrdop@gmail.com
此内容由惯性聚合(RSS阅读器)自动聚合整理，仅供阅读参考。 原文来自 — 版权归原作者所有。