Updated on
:
2 min read
சென்னை: தமிழக முதல்வராக பதவியேற்ற ஜோசப் விஜய்க்கு பிரதமர் மோடி, இலங்கை அதிபர், கர்நாடகா, தெலுங்கானா மாநில முதல்வர்கள் உட்பட பல்வேறு அரசியல் கட்சித் தலைவர்கள் வாழ்த்து தெரிவித்தனர்.
இது தொடர்பாக அவர்கள் வெளியிட்ட வாழ்த்துச் செய்திகளில் கூறியிருப்பதாவது:
பிரதமர் மோடி: தமிழக முதல்வராக பதவியேற்றுள்ள ஜோசப் விஜய்க்கு வாழ்த்துகள். அவரது பதவிக்காலம் சிறப்பானதாக அமைய நல்வாழ்த்துகள். மக்களின் வாழ்க்கையை மேம்படுத்த மத்திய அரசு, தமிழக அரசுடன் இணைந்து தொடர்ந்து பணியாற்றும்.
காங்கிரஸ் கட்சித் தலைவர் மல்லிகார்ஜுன கார்கே: தமிழக முதல்வராக பதவியேற்றுள்ள ஜோசப் விஜய்க்கு எனது வாழ்த்துகள். சுயமரியாதை, சமூகநீதி, அதிகாரம், பகுத்தறிவு சிந்தனை ஆகியவற்றின் நீடித்த வலிமையை இந்த அரசு உறுதிப்படுத்துகிறது.
காங்கிரஸ் மக்களவை எதிர்க்கட்சி தலைவர் ராகுல் காந்தி: தமிழகம் தேர்ந்தெடுத்து விட்டது ஒரு புதிய தலைமுறையை. ஒரு புதிய குரலை. முதல்வராக பொறுப்பேற்று இருக்கும் விஜய்க்கு எனது நல்வாழ்த்துகள்.
தெலங்கானா முதல்வர் ரேவந்த் ரெட்டி: தமிழகத்தின் முதல்வராக பதவியேற்ற விஜய், ஏழை எளியோருக்கான நலத்திட்டங்களையும், சமமான நீதியையும் வழங்கி, தமிழகத்தை வளர்ச்சியின் அடுத்த கட்டத்துக்கு எடுத்துச் செல்வார் என நம்புகிறேன்.
கர்நாடக முதல்வர் சித்தராமையா: இரு மாநிலங்களுக்கு இடையிலான உறவை வலுப்படுத்தவும், மதச்சார்பின்மை, அரசியலமைப்பு விழுமியங்களை காக்கவும், பிளவுபடுத்தும் சக்திகளுக்கு எதிரான கூட்டு போராட்டத்தை முன்னெடுத்துச் செல்லவும் முதல்வர் ஜோசப் விஜய்யுடன் இணைந்து பணியாற்ற ஆவலுடன் காத்திருக்கிறேன்.
ஆந்திர துணை முதல்வர் பவன் கல்யாண்: தமிழகத்தில் அமையவிருக்கும் புதிய அரசு, மக்களின் விருப்பங்களை நிறைவேற்றி, வெளிப்படையான மற்றும் முற்போக்கான ஆட்சியை வழங்கி, தமிழகத்தை மேலும் வளர்ச்சியை நோக்கி வழிநடத்தும் என்று நம்புகிறேன். முதல்வராக பதவியேற்ற ஜோசப் விஜய்க்கு வாழ்த்துகள்.
கேரள முன்னாள் முதல்வர் பினராயி விஜயன்: தமிழக மக்கள் ஜோசப் விஜய் மீது வைத்துள்ள நம்பிக்கை, சமூக நீதி, மதச்சார்பின்மை மற்றும் பொது நலன் ஆகிய விழுமியங்களை நிலைநிறுத்தும் ஓர் ஆட்சி மாதிரியாக மாறும் என்று நம்புகிறேன்.
மத்திய இணையமைச்சர் எல்.முருகன்: தமிழக மக்களின் நலனையும், மாநிலத்தின் வளர்ச்சியையும் முன்னிறுத்தி, முதல்வராக பொறுப்பேற்றுள்ள ஜோசப் விஜய் சிறப்பாக செயலாற்ற வாழ்த்துகிறேன்.
ஈஷா நிறுவனர் சத்குரு: தமிழகத்தின் முதல்வராக பொறுப்பேற்றுள்ள ஜோசப் விஜய்க்கும், மாநில மக்களின் அபிலாஷைகளை நிறைவேற்றுவதில், வரவிருக்கும் புதிய ஆட்சிக்கும் எங்களது மனமார்ந்த நல்வாழ்த்துகளை தெரிவித்துக் கொள்கிறோம்.
தமிழக பாஜக தலைவர் நயினார் நாகேந்திரன்: மக்களின் நலனையும், மாநிலத்தின் முன்னேற்றத்தையும் முதன்மையாக கொண்டு, நலத்திட்டங்களை செயல்படுத்தி, சிறந்த ஆட்சியை வழங்க வாழ்த்துகளை தெரிவித்துக் கொள்கிறேன்.
பாமக நிறுவனர் ராமதாஸ்: ஜோசப் விஜய் தலைமையிலான புதிய அரசு, தமிழக மக்களின் நலனையும், சமூக நீதியையும், வளர்ச்சியையும் முன்னிறுத்தி சிறப்பான ஆட்சியை வழங்கும் என்ற நம்பிக்கை உள்ளது.
பாமக தலைவர் அன்புமணி: போதை இல்லாத, பெண்களும், குழந்தைகளும் பாதுகாப்பாக வாழக்கூடிய, அடித்தட்டு மக்களின் வாழ்க்கையை மேம்படுத்தக் கூடிய அரசு அமைய வேண்டும் என்ற மக்களின் எதிர்பார்ப்புகளை நிறைவேற்ற புதிய அரசு தீவிரமாக முயற்சி செய்ய வேண்டும்.
திமுக துணை பொதுச்செயலாளர் கனிமொழி: தமிழக முதல்வராக பொறுப்பேற்றிருக்கும் ஜோசப் விஜய்க்கும், பொறுப்பேற்றுள்ள அமைச்சர்களுக்கும் வாழ்த்துகள்.
விசிக தலைவர் திருமாவளவன்: தமிழக முதல்வராக பதவி ஏற்கும் தவெக தலைவர் விஜய்க்கு எனது மனமார்ந்த வாழ்த்துகள்.
தேமுதிக பொதுச்செயலாளர் பிரேமலதா விஜயகாந்த்: முதல்வராக பதவியேற்கும் எங்க வீட்டு பையன், தம்பி விஜய்க்கு மனப்பூர்வமான வாழ்த்துகளை தெரிவித்துக் கொள்கிறேன்.
திக தலைவர் கி.வீரமணி: முதல்வராக பதவியேற்ற விஜய்க்கு வாழ்த்துகளை தெரிவித்துக் கொள்கிறேன்.
மார்க்சிஸ்ட் கம்யூனிஸ்ட் மாநில செயலாளர் பெ.சண்முகம்: மார்க்சிஸ்ட், இந்திய கம்யூனிஸ்ட், விசிக, இந்திய யூனியன் முஸ்லீம் லீக் ஆதரவுடன் முதல்வர் பொறுப்பேற்று இருக்கும் தவெக தலைவர் ஜோசப் விஜய்க்கு வாழ்த்துகள்.
இந்திய கம்யூனிஸ்ட் மாநில செயலாளர் மு.வீரபாண்டியன்: மதச்சார்பற்ற, வேற்றுமையில் ஒற்றுமை பேணும் கொள்கை வழியில் நின்று, ஜோசப் விஜய்யின் சீரிய தலைமை, அதன் தேர்தல் கால வாக்குறுதிகளையும், முந்தைய அரசின் நலத்திட்டங்களையும் முன்னெடுத்து செல்வதில் வெற்றிபெறட்டும்.
தமாகா தலைவர் ஜி.கே.வாசன்: காமராஜர், மூப்பனார் ஆகியோரது தாரக மந்திரமான வளமான தமிழகம், வலிமையான பாரதம் என்பதற்கு ஏற்ப ஜோசப் விஜய்யின் ஆட்சி நடைபெறட்டும்.
மநீம தலைவர் கமல்ஹாசன்: முதல்வர் விஜய்யின் தலைமைத்துவத்தில், தமிழகம் சிறக்கட்டும். புதிய உயரங்களை அடையட்டும்.
அமமுக பொதுச்செயலாளர் டிடிவி தினகரன்: தமிழகத்தில் பொறுப்பேற்றிருக்கும் புதிய அரசுக்கு எனது மனமார்ந்த நல் வாழ்த்துகளை தெரிவித்துக் கொள்கிறேன்.
நாம் தமிழர் கட்சி தலைமை ஒருங்கிணைப்பாளர் சீமான்: திமுக - அதிமுக அல்லாத ஒரு கட்சி பல்லாண்டுகள் கழித்து தமிழகத்தை ஆளவிருப்பதில் மகிழ்கிறேன்.
ஐஜேகே தலைவர் ரவிபச்சமுத்து: தமிழகத்தில் வரலாற்று சாதனையை படைத்து, ஆட்சியை அமைத்திருக்கும் ஜோசப் விஜய்க்கு எனது வாழ்த்துகள்.
இவர்களுடன் தமிழக பாஜக முன்னாள் மாநில தலைவர் அண்ணாமலை, புரட்சி அண்ணா திமுக நிறுவனர் வா.புகழேந்தி, முக்குலத்தோர் புலிப்படைத்தலைவர் சேது.கருணாஸ், எஸ்டிபிஐ கட்சியின் மாநிலத் தலைவர் முகம்மது முபாரக், இந்திய தவ்ஹீத் ஜமாஅத் பொதுச்செயலாளர் முஹம்மது ஷிப்லி உள்ளிட்டோரும் வாழ்த்து தெரிவித்துள்ளனர்.
此内容由惯性聚合(RSS阅读器)自动聚合整理，仅供阅读参考。 原文来自 — 版权归原作者所有。