Updated on
:
2 min read
சென்னை: ‘தேர்தல் முடிவுகள் அறிவிக்கப்பட்ட பிறகு, தொகுதி மாறி அனுப்பப்பட்ட தபால் வாக்கை மீட்டு மறு எண்ணிக்கை நடத்த தேர்தல் அதிகாரிக்கு அதிகாரமில்லை’ என உயர் நீதிமன்றத்தில் தேர்தல் ஆணையம் விளக்கமளித்துள்ளது.
சிவகங்கை மாவட்டம் திருப்பத்தூர் தொகுதி திமுக வேட்பாளரான முன்னாள் அமைச்சர் கே.ஆர்.பெரியகருப்பன் ஒரு ஓட்டு வித்தியாசத்தில் தவெக வேட்பாளர் சீனிவாச சேதுபதியிடம் தோல்வியடைந்தார் அதையடுத்து மறுவாக்கு எண்ணிக்கை முறையாக நடைபெறவில்லை என அவர் வழக்கு தொடர்ந்தார்.
அதில், “எனது தொகுதிக்கு பதிவான ஒரு தபால் வாக்கை அதிகாரிகள் தவறுதலாக வேலூர் அருகேயுள்ள திருப்பத்தூர் தொகுதிக்கு மாற்றி அனுப்பி விட்டனர்.
எனவே அந்த தபால் வாக்கை மீட்டு மறு எண்ணிக்கை நடத்த தேர்தல் ஆணையத்துக்கு உத்தரவிட வேண்டும், அதுவரை சீனிவாச சேதுபதி சட்டப்பேரவையில் நடைபெறும் நம்பிக்கை வாக்கெடுப்பில் பங்கேற்க தடை விதிக்க வேண்டும்” என கோரியிருந்தார்.
இந்த வழக்கை ஞாயிறன்று விசாரித்த நீதிபதிகள் எல்.விக்டோரியா கவுரி, என்.செந்தில்குமார் அமர்வு, இதுதொடர்பாக தேர்தல் ஆணையம் விளக்கமளிக்க உத்தரவிட்டிருந்தனர்.
அதன்படி இந்த வழக்கில் தமிழக தலைமை தேர்தல் அதிகாரி அர்ச்சனா பட்நாயக் தாக்கல் செய்துள்ள பதில்மனுவில், “தேர்தல் முடிவுக்கு எதிராக உயர் நீதிமன்றத்தில் தேர்தல் வழக்குதான் தொடர முடியும்.
அந்த தேர்தல் வழக்கை விசாரிக்கும் உயர்நீதிமன்றம்தான் அத்தொகுதியின் தேர்தல் வெற்றி செல்லுமா, செல்லாதா என்பதை தீர்மானிக்கும். அதைத் தவிர்த்து ரிட் வழக்கு தொடர்ந்து இதற்கு பரிகாரம் தேட முடியாது.
இதை மக்கள் பிரதிநிதித்துவ சட்டமும், உச்ச நீதிமன்ற தீர்ப்புகளும் உறுதி செய்துள்ளன. சிவகங்கை மாவட்டம் திருப்பத்தூர் தொகுதிக்கு பதிவான தபால் வாக்கு தொகுதி மாற்றி அனுப்பி வைக்கப்பட்டுள்ளதாகக் கூறப்படும் குற்றச்சாட்டுக்கு எந்த ஆதாரமும் இல்லை.
மேலும் தேர்தல் முடிவு அறிவிக்கப்பட்ட பிறகு ஒரு தொகுதியில் எண்ணப்பட்ட தபால் வாக்கை வேறு தொகுதிக்கு அனுப்பி வைக்கவும் முடியாது.
அதேபோல தேர்தல் முடிவு அறிவிக்கப்பட்ட பிறகு வேறு தொகுதிக்கு அனுப்பப்பட்ட தபால் வாக்கை மீட்டு, மறு எண்ணிக்கை நடத்தக் கோரும் மனு மீது முடிவெடுக்க சம்பந்தப்பட்ட தேர்தல் அதிகாரிக்கும் அதிகாரம் இல்லை.
ஒரே பெயர் கொண்ட தொகுதிகளுக்கான வாக்குகளை கையாளும்போது தேர்தல் அதிகாரிகள் மிகுந்த எச்சரிக்கை உணர்வுடன் செயல்பட ஏற்கெனவே அறிவுறுத்தப்பட்டுள்ளது.
அதன் காரணமாகவே தபால் வாக்குகளில் தொகுதி எண் குறிப்பிடப்பட்டு சம்பந்தப்பட்ட தொகுதிகளுக்கு அனுப்பி வைக்கப்படுகின்றன. தபால் வாக்கு வேறு தொகுதிக்கு அனுப்பி வைக்கப்பட்டதாக கற்பனையாக கூறப்படும் குற்றச்சாட்டு அடிப்படை ஆதாரமற்றது.
எனவே இந்த வழக்கை அபராதத்துடன் தள்ளுபடி செய்ய வேண்டும்” எனக் கோரப்பட்டிருந்தது. இந்நிலையில், தேர்தல் ஆணையம் தரப்பில் மூத்த வழக்கறிஞர் ஜி.ராஜகோபாலனும், பெரியகருப்பன் தரப்பில் மூத்த வழக்கறிஞர் என்.ஆர்.இளங்கோவும் ஆஜராகி வாதிட்டனர். இருதரப்பு வாதங்களையும் கேட்ட நீதிபதிகள், தீர்ப்பை தேதி குறிப்பிடாமல் தள்ளிவைத்துள்ளனர்.
此内容由惯性聚合(RSS阅读器)自动聚合整理，仅供阅读参考。 原文来自 — 版权归原作者所有。