Updated on:
ஈஸ்ட் ரூதர்போர்டு: உலகக் கோப்பை கால்பந்து தொடரில் நேற்று அமெரிக்காவின் நியூ ஜெர்சியில் உள்ள மெட்ஃலைப் மைதானத்தில் ‘ஐ’ பிரிவில் நடைபெற்ற லீக் ஆட்டத்தில் நார்வே - செனகல் அணிகள் மோதின.
ஆட்டத்தின் 43-வது நிமிடத்தில் செனகல் அணியின் தற்காப்பு அரண் செய்த தவறுகளைப் பயன்படுத்தி, நார்வே அணியின் மார்கஸ் ஹோல்ம்கிரென் பெடர்சன் அபாரமான கோல் அடித்தார். இதனால் நார்வே அணி முதல் பாதி ஆட்டத்தில் 1-0 என முன்னிலை வகித்தது.
48-வது நிமிடத்தில் நார்வே அணியின் மார்ட்டின் ஓடேகார்ட் கொடுத்த அருமையான பாஸை பெற்ற, நட்சத்திர வீரரான எர்லிங் ஹாலந்து தனது இடது காலால் வலுவாக உதைத்த பந்த கோல் வலையை துளைத்தது. இதனால் நார்வே அணி 2-0 என முன்னிலை பெற்றது.
53-வது நிமிடத்தில் செனகல் அணி பதிலடி கொடுத்தது. அந்த அணியின் நட்சத்திரமான சாடியோ மானேவின் உதவியுடன் பந்தை பெற்ற இஸ்மைலா சர் கோல் அடித்து அசத்தினார். அடுத்த 5-வது நிமிடத்தில் நார்வே அணி தனது 3-வது கோலை அடித்து மிரட்டியது.
58-வது நிமிடத்தில் 18 அடி தூர பாக்ஸிற்குள் செனகல் வீரர் குலிபாலி பந்தைச் சரியாகக் கட்டுப்படுத்த முடியாமல் நிலைதடுமாறியபோது, நார்வே வீரர் பேட்ரிக் பெர்க் சாதுரியமாகப் பந்தை மீட்டெடுத்து எர்லிங் ஹாலந்துக்கு அனுப்ப, அவர் வலுவாக அடித்த ஷாட் கோல் வலைக்குள் பாய்ந்தது. இதனால் நார்வே அணி 3-1 என முன்னிலை பெற்றது. நிர்ணயிக்கப்பட்ட 90 நிமிடங்களில் நார்வே அணி 3-1 என முன்னிலையில் இருந்தது.
இதன் பின்னர் காயங்களுக்கு இழப்பீடாக வழங்கப்பட்ட 3-வது நிமிடத்தில் செனகல் வீரர் நியாகட்டே 18 அடி தூர பாக்ஸிற்குள் வளைவான கிராஸை அனுப்பினார். அப்போது நார்வே தற்காப்பு வீரர் ஆயர் துள்ளியவாறு தலையால் முட்ட முயன்றார். அவர், பந்தைக் கணிக்கத் தவறியதால், அவருக்குப் பின்னால் இருந்த செனகல் வீரர் ஜேக்சனுக்கு பந்து சென்றது.
அதை அவர், தாமதிக்காமல் முதல் டச்சிலேயே இஸ்மைலா சர்ருக்குப் பக்கவாட்டில் தட்டிவிட்டார். கோல் கம்பத்துக்கு மிக அருகில் தயாராக இருந்த இஸ்மைலா சர், அதை மிக எளிதாக கோலாக்கினார். இதனால் செனகல் அணி 2-3 என நெருங்கி வந்தது. ஆனால் எஞ்சியிருந்த 8 நிமிடங்களில் அந்த அணியால் மேற்கொண்டு கோல் அடிக்க முடியாமல் போனது. முடிவில் நார்வே அணி 3-2 என்ற கோல் கணக்கில் வெற்றி பெற்றது.
அந்த அணிக்கு இது 2-வது வெற்றியாக அமைந்தது. நார்வே அணி தனது முதல் ஆட்டத்தில் இராக்கை 4-1 என்ற கோல் கணக்கில் வீழ்த்தியிருந்தது. தற்போதைய வெற்றியின் மூலம் நார்வே அணி தனது பிரிவில் 6 புள்ளிகளுடன் நாக் அவுட் சுற்றில் கால்பதித்தது. நார்வே அணி தனது கடைசி லீக் ஆட்டத்தில் வரும் 27-ம் தேதி பலம் வாய்ந்த பிரான்ஸ் அணியை சந்திக்கிறது.
செனகல் அணி 2 ஆட்டங்களிலும் தோல்வியை சந்தித்து இருந்தாலும் அந்த அணி அடுத்த சுற்றுக்கு முன்னேறுவதற்கான வாய்ப்பு உள்ளது. செனகல் தனது கடைசி லீக் ஆட்டத்தில் வரும் 27-ம் தேதி இராக்குடன் மோதுகிறது. இதில் வெற்றி பெற்றால் 3-வது சிறந்த அணிகளின் பட்டியலில் இடம் பிடித்து நாக் அவுட் சுற்றுக்குள் நுழைய வாய்ப்பு உள்ளது.
12 போட்டியில் 24 கோல்கள்
25 வயதாகும் எர்லிங் ஹாலந்து, நார்வே அணிக்காக கடைசியாக விளையாடிய 12 சர்வதேச போட்டிகளில் 24 கோல்கள் அடித்துள்ளார். அவர், ஒவ்வொரு ஆட்டத்திலும் குறைந்த பட்சம் ஒரு கோல் அடித்துள்ளார். அதேவேளையில் ஒட்டுமொத்தமாக 52 சர்வதேச போட்டியில் விளையாடி உள்ள எர்லிங் ஹாலந்து 59 கோல்களை அடித்துள்ளார்.கடந்த 2018-ம் ஆண்டு நடைபெற்ற உலகக் கோப்பை கால்பந்து தொடரில் இங்கிலாந்தின் ஹாரி கேன் தனது முதல் 2 ஆட்டங்களிலும் தலா 2 கோல்கள் அடித்து சாதனை படைத்திருந்தார். இந்த சாதனையை தற்போது நார்வே அணியின் எர்லிங்
ஹாலந்து சமன் செய்துள்ளார். நடப்பு உலகக் கோப்பை தொடரில் நார்வே அணியின் எர்லிங் ஹாலந்து இராக் அணிக்கு எதிரான ஆட்டத்திலும், செனகலுக்கு எதிரான ஆட்டத்திலும் தலா 2 கோல்கள் அடித்து அசத்தினார்.
此内容由惯性聚合(RSS阅读器)自动聚合整理，仅供阅读参考。 原文来自 — 版权归原作者所有。