Updated on:
அளவான ஆசையும் குறைவான தேவையும் நிறைவான வாழ்க்கைக்கு வழி என்பதை உணர்ந்து எப்போதும் எதார்த்தமான வாழ்க்கையை வாழும் தனுசு ராசிக்காரர்களே!
குரு பகவான், ஜூன் 2 முதல் உங்கள் ராசிக்கு 8-ம் இடத்தில் வந்து அமர்ந்து பலன் தரப்போகிறார். எட்டில் சென்று மறைவதால், எந்த செயலையும் நிதானத்துடன் கையாண்டாலே போதும். பழைய பிரச்சினைகளுக்கு மாறுபட்ட கோணத்தில் யோசித்து தீர்வு காண்பீர்கள். குடும்பத்தில் அமைதி இருக்கும். எனினும் கணவன் - மனைவிக்குள் சின்னச் சின்ன பிரச்சினைகள் வர வாய்ப்பு உள்ளது. ஒருவருக்கொருவர் விட்டுக்கொடுத்துப் போகவும். வரவு மிஞ்சிய செலவுகளைத் தவிர்த்து விடுங்கள். பிள்ளைகள் கேட்டுவிட்டார்களே என்று கையிருப்பைக் கரைக்காதீர்கள்.
பேச்சிலும் செயலிலும் நிதானம் அவசியம். சந்தேகத்தால் நல்லவர்களின் நட்பை இழந்து விடாதீர்கள். போலியான நிதி நிறுவனங்களில் முதலீடு செய்து மாட்டிக் கொள்ளாதீர்கள். வீண் பழிகள், அவச்சொல்லுக்கு ஆளாக நேரிடும். திடீர் பயணங்கள் இருக்கும்.
குரு பகவானின் பார்வை பலன்கள்:
குரு பகவான் 2-ம் இடத்தைப் பார்ப்பதால், கம்பீரமாக பேசுவீர்கள். வெளிவட்டாரத்தில் உங்களின் செல்வாக்கு கூடும். குடும்பத்தில் மகிழ்ச்சி உண்டு. உங்களுக்கு ஆதரவாக இருப்பார்கள். எதிர்பார்த்தபடி பணவரவு இருக்கும். அத்தியாவசியப் பொருள்களை வாங்குவீர்கள்.
குரு பகவான் 4-ம் இடத்தைப் பார்ப்பதால், தாயாருக்கு இருந்து வந்த மருந்து மாத்திரைச் செலவுகள் இனி படிப்படியாகக் குறையும். அவர் வழிச் சொத்து கைக்கு வரும். சிலர் பழைய சொத்தை விற்றுவிட்டுப் புதிதாகச் சொத்து வாங்குவீர்கள். வீட்டை விரிவுபடுத்திக் கட்டுவீர்கள். புதிய வாகனங்கள் வாங்குவீர்கள். உடல் சோர்வு, வீண் அலைச்சல், டென்ஷன் விலகும்.
குரு பகவான் 12-ம் இடத்தைப் பார்ப்பதால், மறைமுகப் பணவரவு இருக்கும். அரசு காரியங்களில் அலட்சியமாக இருக்காதீர்கள். திடீர்ப் பயணங்கள் கூடி வரும். அதன் மூலம் ஆதாயமும் உண்டு. அநாவசிய செலவுகளைக் கட்டுப்படுத்துங்கள்.
குரு பகவானின் நட்சத்திர சஞ்சாரம்:
உங்களின் ராசிநாதனான குருபகவான் தனது நட்சத்திரத்தில் 02.06.26 முதல் 18.06.26 வரை பயணம் செய்வதால் உங்களின் தனித்திறமை வெளிப்படும். புதிய கோணத்தில் பிரச்சினைகளை கையாண்டு தீர்வு காண்பீர்கள். பிரபலங்கள் அறிமுகமாவார்கள். எதிர்பார்த்த வகையில் உதவிகள் கிடைக்கும்.
தன - தைரியாதிபதியுமான சனிபகவானின் நட்சத்திரத்தில் 18.06.26 முதல் 19.08.26 வரை குருபகவான் பயணம் செய்வதால் குடும்பத்தில் செல்வாக்கு அதிகரிக்கும். இழந்த தொகை கைக்கு வரும். அடகில் இருந்த நகைகளை மீட்பீர்கள். சொந்த ஊரில் மதிப்பு கூடும். அலுவலக ரீதியாக வெளியூர் பயணம் மேற்கொள்வீர்கள். வியாபாரத்தை பெரிய அளவில் விரிவுபடுத்துவீர். அரசியலில் ஈடுபடுபவர்களுக்கு யோக காலமாக அமையும். புதிய தொழிலதிபர்கள் வெற்றி பெறுவார்கள்.
பாதக - ஜீவனாதிபதியுமான புதனின் நட்சத்திரத்தில் 19.08.26 முதல் 31.10.26 வரை மற்றும் 25.01.27 முதல் 26.06.27 வரை குருபகவான் பயணம் செய்வதால் வீண் செலவுகள் அதிகரிக்கும். கணவன் மனைவிக்குள் விட்டுக் கொடுத்துப் போவது நல்லது. பணம் கொடுத்து ஏமாறாதீர்கள். உத்தியோகத்தில் வேலைச்சுமை கூடும். அம்மாவின் ஆரோக்கியத்தில் அக்கறை காட்டுவது நல்லது. உடன் பிறந்தவர்களை அனுசரித்து நடந்து கொள்ளவும். பூர்வீக சொத்து வழக்கில் அனைவரையும் அரவணைத்துச் செல்வது நல்லது. பேச்சில் கவனம் காக்கவும். யாரை மனதையும் புண்படுத்தும்படி பேசவோ, செயல்படவோ வேண்டாம்.
கேதுவின் நட்சத்திரத்தில் 31.10.26 முதல் 25.01.27 வரை குருபகவான் செல்வதால் தடைபட்டுக் கொண்டிருந்த வேலைகள் உடனே முடியும். வரவுக்கு மிஞ்சிய செலவுகள் அதிகரிக்கும். திடீர் பயணங்கள் வரக்கூடும். ஆன்மிகத்தில் மனம் லயிக்கும். கர்ப்பிணிப் பெண்கள் அதிக பாரம் சுமக்க வேண்டாம். வீட்டில் முதியவர்களுக்கு மரியாதை கொடுக்கவும். சாலையைக் கடக்கும்போது கவனமாக இருக்கவும். பார்வை குறைபாடு உள்ளவர்களுக்கு உதவி புரிவது நன்மை தரும்.
வியாபாரம், உத்தியோகம்:
வியாபாரத்தில் திடீர் லாபத்தால் திக்குமுக்காடுவீர்கள். நவீன விளம்பர யுக்திகளைக் கையாண்டு வாடிக்கையாளர்களை அதிகப்படுத்துவீர்கள். கொடுக்கல் வாங்கலில் சுமுகமான நிலை ஏற்படும். சிலர், பழைய கடையை வேறிடத்துக்கு மாற்றுவீர்கள். ஹோட்டல், ரியல் எஸ்டேட், வாகன உதிரி பாகங்கள் மூலம் ஆதாயமடைவீர்கள். அரசுக்குச் செலுத்த வேண்டிய வரிகளை முறையே செலுத்தி விடுங்கள். கூட்டுத்தொழிலில் புது ஒப்பந்தங்கள் கையெழுத்தாகும்.
உத்தியோகத்தில், உங்களின் திறமைக்கு அங்கீகாரம் கிடைக்கும். பதவி உயர்வு, சம்பள உயர்வு கிடைக்கும். மேலதிகாரியின் சொந்த விஷயங்களில் தலையிடும் அளவுக்கு நெருக்கமாவீர்கள். அதேசமயம் சக ஊழியர்களிடம் அதிக உரிமை எடுத்துக் கொள்ள வேண்டாம். புதிய வாய்ப்புகள் வந்தால் யோசித்து முடிவெடுங்கள். கணினித் துறையினருக்கு சலுகைகள் கிடைக்கும். கண் பார்வைக் கோளாறு, முதுகுத் தண்டில் வலி வரும். கலைஞர்கள் உங்களின் திறமையால் சாதித்துக் காட்டுவீர்கள். இந்த குருப்பெயர்ச்சி சிந்தித்து செயல்பட்டு சாதிக்கும் காலமாக அமையும்.
குரு பகவான் பரிகார தலங்கள்:
மயிலாடுதுறை - பூம்புகார் சாலையில் 12 கி.மீ தொலைவில் உள்ள பொன்செய் - திருநனிபள்ளி நற்றுணையப்பர் கோயில் தட்சிணாமூர்த்தியை வணங்குங்கள். ஆசிரமத்தில் வாழும் குழந்தைகளுக்கு ஏதேனும் ஒரு வகையில் உதவுங்கள். எதிலும் நன்மையே கிட்டும்.
ராசி பலன், ஜோதிடத்தில் குறிப்பிடப்படும் பலன்கள் அனைத்தும் ஜோதிடரின் கணிப்புகளே. அவை 'இந்து தமிழ் திசை'யின் கருத்துகள் அல்ல.
此内容由惯性聚合(RSS阅读器)自动聚合整理，仅供阅读参考。 原文来自 — 版权归原作者所有。